ಮುದಿಹದ್ದು - ಮರಿಗುಬ್ಬಿ

ಅಗೋ ಕುಳಿತಿವೆ ನೋಡು ಮುದಿಗೂಬೆಗಳು
ಹಾರಲಾಗದೆ ಹೊಂಚುಹಾಕುವ ರಣಹದ್ದುಗಳು
ಹಾರುವುದು ಹೇಗೆಂದು ಉಪದೇಶ ನೀಡುತ್ತಾ
ಹಾರದ ಗುಬ್ಬಿಗಳ ಹಿಡಿದು ತಿಂದಿಹವು II

ಗುಬ್ಬಿಗಳ ಕುಕ್ಕುವುದು ಹೇಗೆಂದು ಅರಿತು
ಕಾಗೆಗಳ ಜೈಕಾರದಲಿ ಮೈಯ್ಯ ಮರೆತು
ಹಸಿ ಮಾಂಸ ಹರಿದ್ಹರಿದು ಮುಕ್ಕುತಿವೆ ನೋಡು
ಪಾಪಾ! ಗುಬ್ಬಿಗಳ ನರಳಾಟ! ನಾಯಿಪಾಡು II

ಕುಂತರೆ ತಪ್ಪು! ಹಾರಿದರೆ ತಪ್ಪು! ಹಾಡಿದರೆ ತಪ್ಪು!
ಮೌನವೂ ತಪ್ಪು! ಕಾಳ ಹೆಕ್ಕಲು ತಪ್ಪು!
ಹಿಕ್ಕೆ ಹಾಕಲು ತಪ್ಪು! ಚಂದವಿರುವುದು ತಪ್ಪು!
ತಪ್ಪು ಹುಡುಕುವುದೊಂದೆ ಇವಕ್ಕೆ ಒಪ್ಪು II

ಮರಿಗುಬ್ಬಿಗಳಿಗೆ ನುಡಿದಿವೆ ಇವು
ಹಾಗಿರಬೇಕು - ಹೀಗಿರಬೇಕು ನೀವು
ಹಿಂದೆಲ್ಲ ಯೌವನದಿ ಹಾಗಿದ್ದೆವು ನಾವು
ಕೇಳದಿದ್ದರೆ ಕಾದಿಹುದು ನಮ್ಮಿಂದ ಸಾವು II

ನೋಡು! ನಮ್ಮಂತೆ ನಿನಗಿರಲಿ ಕೊಕ್ಕು
ರೆಕ್ಕೆ ಇರಬೇಕು ಇಷ್ಟೂ ಅಗಲಕ್ಕು
ಇಲ್ಲವೆಂದರೆ ಮತ್ತೆ ಮತ್ತೆ ಕುಕ್ಕು
ಬದುಕಬೇಕೆಂದರೆ ನಮ್ಮ ಪಾದ ನೆಕ್ಕು II

ಮರಿಗುಬ್ಬಿ, ನಿನಗೆ ಹದ್ದಾಗೋ ಕನಸು ಬೇಡ
ಜೀವ ಉಳಿಯಲು ಇರುವ ದಾರಿ ನೋಡ
ಜೈಕಾರ ಹಾಕುವ ಕಾಗೆಯಾಗು
ಹದ್ದುಳಿಸಿದ ಹೆಣತಿಂದು ಬದುಕು ಹೋಗು II

(ಯಾವುದೇ ಕಛೇರಿಯಲ್ಲಿ ನಡೆಯೋ ಮೀಟಿಂಗುಗಳಲ್ಲಿ ಇಂಥಾ ಹಿರಿ-ಮುದಿ ಹದ್ದುಗಳು ಸಾಮಾನ್ಯ!)