ತೀರದ ಹೋರಾಟ

ಕಡಲಲಿ ಅಲೆಗಳ ಮೊರೆತ

ತಡಿಯಲಿ ತೀರದ ಕೊರೆತ

ಹಿಂದೆ ಹಿಂದೆ ಸರಿದರೂ ದಡ

ಉಕ್ಕುವ ಅಲೆಗಳಿಗಿಲ್ಲ ದುಗುಡ II

ಅಲೆಗಳ ರಭಸದ ಕೊರೆತ

ಗೋರ್ಕಲ್ಲೂ ಕರಗೋದು ನಿಶ್ಚಿತ

ನೋಡುಗರಿಗಿದು ಕಣ್ಣಿಗೆ ಹಿತ

ದಡಕೆ ಅಳಿವು ಉಳಿವಿನ ನಿತ್ಯಹೋರಾಟ II

ರೈತಣ್ಣಾ...

ಹೊತ್ತು ಮೂಡುವ ಮುನ್ನ

ಎತ್ತು ಹೂಡುವನಣ್ಣಾ

ಉತ್ತು ಭೂಮಿಯ ಮಣ್ಣ

ಬಿತ್ತುತಾ ಬೆಳೆವನು ಚಿನ್ನ !!

(ಆನಂದ್ - 1992)

ನನ್ನೊಳಗಿನಾ ಹಾಡು

ನನ್ನೊಲವಿನಾ...
ನನ್ನೊಳಗಿನಾ...
ಕೋಗಿಲೆಗೆ ಈಗಲೇ
ಹಾಡುವಾಸೆ    II

ಈ ಹಾಡಿನಾ ಒಳಗೇ
ಶೃತಿಯಿಲ್ಲ... ಗತಿಯಿಲ್ಲ
ಸಿರಿಯ ಸೊಬಗಿಲ್ಲಾ...
ಮೆರುಗಿನಾ ಪದವಿಲ್ಲಾ...    II

ರಾಗಗಳ ಇಂಪಿಲ್ಲಾ...
ಭಾವಗಳ ಸೊಂಪಿಲ್ಲಾ...
ತಂಗಾಳಿ ತಂಪಿಲ್ಲಾ
ಈ ಹಾಡಲೀ...    II

ನನ್ನೊಲವಿನಾ...

ನನ್ನೊಳಗಿನಾ...

ಕೋಗಿಲೆಗೆ ಈಗಲೇ 

ಹಾಡುವಾಸೆ    II

(ಆನಂದ್ - 1994)

ಗೀಜಗನ ಗೂಡಿನಲಿ...

ಚಿತ್ರ ಕೃಪೆ: www.madibirder.blogspot.com

ಗೀಜಗನ ಗೂಡಿನಲಿ
ಈ ಜಗದ  ಕಥೆಯಿಹುದು
ಸೋಜಿಗದ ವ್ಯಥೆಯಿಹುದು... ಬಂದು ನೋಡಾ II

ಅಂದು

ದಟ್ಟ ಹಸುರಿನ ನಡುವೆ
ಪುಟ್ಟಗೂಡುಗಳೆಡೆಗೆ
ಕೆಟ್ಟಮನುಜನ ದಿಟ್ಟಿ ಸೋಕದಂತೆ  II

ಎತ್ತ ನೋಡಲು ಕಾಡು
ಸುತ್ತ ಚೆಲ್ಲಿದ ಕಾಳು
ಹೆಕ್ಕಿ ತಿನ್ನಲು ಉಂಟು ಹುಳ ಹುಪ್ಪಟೆ  II

ಹೊರಗೆಲ್ಲ ಹಿಮಗಾಳಿ
ಮೈ ನಡುಗಿಸಿರಲು ಛಳಿ
ಬೆಚ್ಚನೆಯ ಗೂಡಲ್ಲಿ ಅಮ್ಮ ತಬ್ಬಿ  II

ಇಂದು

ಸುರಿಯಲಿಲ್ಲವೋ ಮಳೆಯು
ಒಣಗಿ ನಿಂತಿದೆ ಇಳೆಯು
ಉರಿಬಿಸಿಲು ಹೊರಗೆಲ್ಲಾ, ಗೂಡು ಬೆಂಕಿ  II

ಇಟ್ಟ ಮೊಟ್ಟೆಗಳೆಲ್ಲಾ
ಹುಟ್ಟಿರಲು ಅರೆ ಕಾವಿಗೆ
ಪುಟ್ಟ ಹಕ್ಕಿಗಳೆಲ್ಲಾ ಬಡಕಲಾಗಿ  II

ರೆಕ್ಕೆಯಲಿ ಬಲವಿಲ್ಲ
ಕೊಕ್ಕಿನಲಿ ಹುಳವಿಲ್ಲ
ಹೆಕ್ಕಿ ತಿನ್ನಲು ಸುತ್ತ ಕಾಳು ಒಂದಿಲ್ಲ  II

ಹಸಿರ ಸುಟ್ಟರು ಅವರು
ಉಸಿರ ಬಿಟ್ಟೆವು ನಾವು
ಹೆಸರಾದರೂ ಉಳಿದೀತೆ ಕಟ್ಟಕಡೆಗೆ II

(ಆನಂದ್ - 1999)