ಮಾನವ

ಮಾನವ...

ಹಕ್ಕಿಯಂತೆ
ಹಾರಲು ಕಲಿತ...

ಮೀನಿನಂತೆ
ಈಜಲು ಕಲಿತ...

ಹಂಸದಂತೆ
ತೇಲಲು ಕಲಿತ...

ಮಾನವನಾಗಿ
ಬಾಳಲು ಮರೆತ!!





( ಪಾಪು ಡೈರಿಯಿಂದ - ಆನಂದ್ - 1994)

ಕನ್ನಡಿ

ಚೂರಾದ ಹೃದಯವದು
ಕನ್ನಡಿಯ ಒಡೆದ
ತುಣುಕುಗಳಂತೆ

ಮರಳಿ ಜೋಡಿಸಿಡೆ
ಬಿಂಬ ವಕ್ರವಾಗಿ
ತೋರುವುದೆಂಬ
ನಿನ್ನ ತತ್ವ
ನನಗೆ ಸಮ್ಮತ

ಅದಕ್ಕೇ...
ಆ ನೂರು ಚೂರುಗಳನ್ನು,
ನೂರು ಕನ್ನಡಿಯಾಗಿ ತಿಳಿದು
ನಿನ್ನ ನೂರು ರೂಪ
ನನ್ನ ಕಂಗಳಲ್ಲಿ
ತುಂಬಿಕೊಳ್ಳುವೆನೆಂದ...

(ಆನಂದ್ - 1991)

ರೈತಣ್ಣಾ...

ಹೊತ್ತು ಮೂಡುವ ಮುನ್ನ

ಎತ್ತು ಹೂಡುವನಣ್ಣಾ

ಉತ್ತು ಭೂಮಿಯ ಮಣ್ಣ

ಬಿತ್ತುತಾ ಬೆಳೆವನು ಚಿನ್ನ !!

(ಆನಂದ್ - 1992)

ಕಲಾವಿದೆ

ನನ್ನಾಕೆ,

ಕಣ್ಣರೆಪ್ಪೆಯ

ಕುಂಚದಿಂದ

ನನ್ನ ಹೃದಯದ

ಕ್ಯಾನ್‍ವಾಸಿನಲ್ಲಿ

ತನ್ನದೇ

ಪೋರ್ಟ್‍ರೈಟ್

ರಚಿಸಿದಾಕೆ!

(ಆನಂದ್ - 1993)

ಪ್ರೇಮದ ರಿಮೋಟ್!

ಗೆಳತಿ,

ನಿನ್ನ ಪ್ರೇಮದ

ರಿಮೋಟ್ ಕಂಟ್ರೋಲ್‍ನಿಂದ

ಸಾಗುತ್ತಿದ್ದ

ನನ್ನ ಜೀವನ,

ಅದು ಕೆಟ್ಟ ನಂತರ

ಎಣ್ಣೆ ಹೀರುತ್ತಾ

ಹೊಗೆ ಕಾರುತ್ತಾ

ಸಾಗುತ್ತಿದೆ!

(ಆನಂದ್ - 1992)

ಪ್ರೀತಿಯ ಆಳ!

ಪ್ರೇಯಸಿ,

ನಿನಗೆ ನನ್ನ ಗಾಢಪ್ರೇಮದ

ಆಳ ತೋರಿಸಲು ಹೋಗಿ

ತಳ ತಲುಪಿದ್ದೆ!

ಮೇಲಿನಿಂದ ಮಣ್ಣು

ಸುರಿದು, ಮುಚ್ಚಿ ನನ್ನೇಕೆ

ನೀ ಸಮಾಧಿಗೈದೆ?


ನನ್ನ ಮುಗ್ಧತೆ ನಿನಗೆ

ದೌರ್ಬಲ್ಯದಂತೆ ಕಂಡಿತೆ?

ಭಲೇ! ನಂಬಿದರೆ

ಕೊರಳ ಕೊಯ್ದ

ನಿನ್ನ ಪ್ರವೀಣತೆ


ತಿಳಿ ಗೆಳತಿ

ಮೋಸಗೊಳ್ಳುವುದು

ಅವಮಾನವಲ್ಲ...

ಮೋಸ ಮಾಡುವುದು

ಅಪಮಾನಕರ!!

(ಆನಂದ್ - 1992)

ನಿನ್ನ ನಗೆಯ ಬೆಲೆ...

ನಲ್ಲೇ,
ನಿನ್ನ ಮುಗುಳುನಗೆಯ ಬೆಲೆ
ಹತ್ತು ಪೈಸೆಯಾದರೂ
ನಾ ಕೊಳ್ಳಲಾರೆ...

ಆದರೆ,
ಕೋಟಿ ರಕ್ತದ
ಹನಿಗಳಾದರೂ... ಸರಿಯೇ,

ನನ್ನ ಹೃದಯವನು ಬಸಿದು
ನರನಾಡಿಗಳ ಹಿಂಡಿ
ಧಾರೆಯೆರೆದು...
ಕೊಂಡುಕೊಳ್ಳುವೆ

(ಆನಂದ್ - 1988)